वीरगंज। अवैध हुण्डी कारोबार रोकथाममा पर्सा प्रहरीले पछिल्ला दिनमा कडा निगरानी अघि बढाएसँगै एक साताभित्रै २५ लाख रुपैयाँभन्दा बढी शंकास्पद नगद रकमसहित दुई व्यक्तिलाई पक्राउ गरेको छ।
विशेष सूचनाका आधारमा खटिएका प्रहरी टोलीहरूले जिल्लाका विभिन्न स्थानमा चेकजाँच सुदृढ पार्दै क्रमशः १० लाख र १५ लाख रुपैयाँ बराबरको श्रोत नखुलेको रकम बरामद गर्न सफल भएका हुन्।
पहिलो घटनामा, वीरगञ्ज महानगरपालिका–१६ रजतजयन्ती चोक नजिक चेकजाँचका क्रममा भारतीय मोटरसाइकल (BR 05 P 4060) बाट ल्याइँदै गरिएको १० लाख रुपैयाँ बरामद गरिएकाे हो। मोटरसाइकल चालक भारत मोतिहारीका ५२ वर्षीय सुन्दर साहलाई पक्राउ गरिएको प्रहरीले जनाएको छ। उनलाई नियन्त्रणमा लिएर थप अनुसन्धान अघि बढाइएको छ।
यही क्रममा अर्को विशेष सूचनामा काम गर्दै जिल्ला पर्सा पकाहामिनापुर गाउँपालिकास्थित सडक खण्डमा चेकजाँच गर्दा १५ लाख रुपैयाँ बराबरको अर्को ठूलो रकम बरामद भएको हो। भारतीय नम्बर प्लेट (BR22AF4126) भएको मोटरसाइकलमा लुकाइ–छिपाई ल्याउँदै गरेको अवस्थामा पकाहामिनापुर–९ का ३२ वर्षीय अवधेश पटेल पक्राउ परेका छन्। बरामद रकममा ५००, २००, १०० र ५० रुपैयाँ दरका थुप्रै बण्डल समावेश थिए।
पर्सा प्रहरीले लगातार दुई फरक अपरेसनमार्फत बरामद गरेको उक्त रकमलाई ‘हुण्डीसम्बन्धी कारोबारमा प्रयोग भएको हुन सक्ने’ प्रारम्भिक अनुमान गरेको छ। दुबै घटनामा पक्राउ परेका व्यक्तिहरूमाथि आवश्यक अनुसन्धान अघि बढेको प्रहरीले जानकारी दिएको छ।
सीमावर्ती क्षेत्रलाई केन्द्रविन्दु बनाएर हुण्डी धन्दामा संलग्न समूह सक्रिय रहेको गुनासो बढिरहेका बेला पर्सा प्रहरीले निगरानी झनै कडा बनाएको जनाएको छ। सीमामा हुने अवैध वित्तीय कारोबारले राष्ट्रिय अर्थतन्त्रमा नकारात्मक प्रभाव पार्ने भएकाले प्रहरीका यस्ता कदम प्रभावकारी मानिएका छन्।
