उदयपुर । जिल्ला प्रशासन कार्यालय उदयपुरले दुई पालिकामा हुने उपनिर्वाचनका लागि सुरक्षा व्यवस्था चुस्तदुरुस्त राखिएको जनाएको छ ।
उदयपुरमा बेलका नगरपालिकाको वडा नम्बर ९ र त्रियुगा नगरपालिकाको वडा नम्बर १२ मा वडा अध्यक्ष पदमा उपनिर्वाचन हुँदैछ ।
उपनिर्वाचन हुने स्थानमा नेपाल प्रहरी, सशस्त्र प्रहरी र नेपाली सेना समेतले सुरक्षा दिने व्यवस्था मिलाइएको प्रमुख जिल्ला अधिकारी हरिप्रसाद घिमिरेले जानकारी दिनुभयो ।
उहाँका अनुसार उपनिर्वाचन हुने स्थानमा २ सय ७ जना नेपाल प्रहरी, १३४ जना सशस्त्र प्रहरी र १४० जना नेपाली सेनाले सुरक्षा दिनेछन् ।
उपनिर्वाचन हुने उदयपुरको सदरमुकाम समेत रहेको त्रियुगा नगरपालिका–१२ को १ मतदानस्थल जनप्रेमी आ.वि. पुरानो गाईघाटमा चार वटा उपकेन्द्र निर्माण गरिएको छ भने बेलका नगरपालिका–९ को मतदानस्थल बरपीपल मा.वि.कमलाबारीमा तीन वटा उपकेन्द्रमार्फत मतदान गर्ने व्यवस्था मिलाइएको जिल्ला निर्वाचन कार्यालय उदयपुरका सहायक सूचना अधिकारी दिलीप मगरले जानकारी दिनुभयो ।
२०७९ को स्थानीय तह निर्वाचनमा बेलका नगरपालिका वडा नम्बर ९ मा नेपाली काँग्रेसबाट पदम खड्का र त्रियुगा नगरपालिका वडा नम्बर १२ मा नेपाली काँग्रेसबाट चुडाराज काफ्ले निर्वाचित हुनुभएको थियो । उहाँहरूको छुट्टाछुट्टै स्थानमा सवारी दुर्घटनामा मृत्यु भएपछि रिक्त रहेको स्थानमा भोली आइतबार उपनिर्वाचन हुन लागेको हो ।
यसैबीच, उदयपुरमा आइतबार हुने उपनिर्वाचनको सम्पुर्ण तयारी समेत पुरा भएको जिल्ला निर्वाचन कार्यालय उदयपुरले जानकारी दिएको छ ।
निर्वाचन कार्यालयले शनिबार बिहानैदेखि आवश्यक जनशक्ति परिचालन गरेर मतदान केन्द्रको सबै तयारी पूरा गरेको जनाएको छ ।
उपनिर्वाचन हुने बेलका नगरपालिका–९ मा १ हजार ५७२ पुरुष र १ हजार ५६४ महिला गरी ३ हजार १३६ जना मतदाता रहेको र त्रियुगा नगरपालिका– १२ मा १ हजार ८ सय ७६ जना पुरुष र १ हजार ९७१ महिला गरी कुल ३ हजार ८४७ जना मतदाता रहेको जिल्ला निर्वाचन कार्यालय उदयपुरले जनाएको छ ।
मतदान भोली आइतबार बिहान ७ः०० बजेदेखि साँझ ५ः०० बजेसम्म हुने छ ।
त्यस्तै, उपनिर्वाचन हुने दुवै पालिकाले एक विज्ञप्ति जारी गरी आइतबार सार्वजनिक बिदा दिएका छन् ।
