नेपालगञ्ज । बाँकेको वैजनाथ गाउँपालिकास्थित नौवस्ता औद्योगिक क्षेत्रको निर्माण कार्य अगाडि बढाउन बैजनाथको सर्वदलीय टोलीले कांग्रेस सभापति शेर बहादुर देउवालाई ज्ञापनपत्र बुझाएको छ ।
सर्वदलीय टोलीले देउवा निवास बुढानिलकण्ठ पुगेर ध्यानाकर्षणपत्र बुझाएको बैजनाथ गाउँपालिकाका अध्यक्ष प्रकाश बहादुर शाहीले बताउनुभयो । भेटमा देउवाले नौवस्ता औद्योगिक क्षेत्र निर्माणको कार्य अगाडि बढाउन आवश्यक पहल गर्ने बताउनुभएको शाहीले जानकारी दिनुभयो ।
बैजनाथ गाउँपालिका अध्यक्ष प्रकाशबहादुर शाहीले नौवस्ता औद्योगिक क्षेत्रभित्र बसोबास गरिरहेका जनताको तत्काल व्यवस्थापन गरी निर्माण कार्य अघि बढाउन आवश्यक पहल गरिदिनका लागि आग्रह गरेको बताउनुभयो ।
त्यसक्रममा प्रतिनिधिसभाका सांसद, प्रदेशसभा सांसद लगायत विभिन्न दलका स्थानीय प्रतिनिधिहरुको सहभागिता थियो ।
