गण्डकी । फिल्म ‘पूर्णबहादुरको सारङ्गी’लाई दर्शकले जति रुचाइरहेका छन्, यसमा समावेश गीत ‘रैया चाँदीको’लाई पनि श्रोता-दर्शकले उत्तिकै मनपराएका छन् । कात्तिक ७ गते युट्युबमा सार्वजनिक उक्त गीतलाई हालसम्म ५० लाखभन्दा बढी पटक हेरिएको छ । आशिष अविरल र मेलिना राईद्वारा स्वरबद्ध उक्त गीतमा नवराज पन्तको शब्द र आशिष अविरलकै सङ्गीत छ ।
ठेट शब्द, मौलिक भाका र गायकीका कारण उक्त गीत श्रोता-दर्शकको रोजाइमा पर्न सफल भएको हो । दर्शकको अपार साथसहित दोस्रो सातामा चलिरहेको फिल्म ‘पूर्णबहादुरको सारङ्गी’सँगै यस गीतले पनि चर्चा बटुलिरहेको छ । गायक तथा सङ्गीतकार आशिष अविरलका अनुसार ‘रैया चाँदीको’ थेगो र भाका एक वर्षअघि नै तयार भइसकेको थियो । गीतकार नवराज पन्तले थेगो दिएपछि आफूले धुन भरेको उनले सुनाए ।
‘गीत ल्याउने भन्दाभन्दै झन्डै एक वर्ष बितिसकेको थियो, शब्दले पनि पूर्णता पाइसकेको थिएन’, आशिषले भने, ‘अहिले सोही गीत फिल्म ‘पूर्णबहादुरको सारङ्गी’मा समावेश भयो, श्रोता-दर्शकले पनि अत्यधिक रुचाइदिनुभएको छ ।’
फिल्म निर्माताले ३० को दशकमा प्रचलित भाखा र शैलीको गीत मागेपछि शब्द तथा सङ्गीतमा सामान्य परिमार्जनसहित उक्त गीत उपलब्ध गराइएको आशिषले बताए ।
फिल्मको विषय र कथानकसँग मिल्दोजुल्दो भावमा बनेकाले निर्माताले पनि एकैपटकमा उक्त गीतलाई स्वीकारेको उनको भनाइ छ । बागलुङे हुनुको नाताले गीतमा प्रयुक्त ‘रैया चाँदीको, म त बागलुङे, मैंया मादीको’ बोलको गीत गाउन पाउनु आफ्ना लागि विशेष रहेको आशिषले बताए । ‘यो गीत मेरो जिल्लावासीका लागि एउटा उपहारजस्तो पनि हुनपुग्यो, इतिहास बनाउन सफल फिल्मका लागि गीत गाउन र सङ्गीत दिन पाउनु मेरा लागि सौभाग्यको विषय हो’, उनले भने ।
गीतकार पन्तका लागि पनि यो गीत उनको गीति लेखनको यात्रामा नयाँ मोड बन्न आइपुगेको छ । ‘सालको पातको टपरी’ जस्तो सर्वाधिक सफल लोकदोहोरी गीत रचना गरेका पन्तको गीत पहिलोपटक फिल्ममा समावेश भएको हो । ‘सेतो धर्ती’ उपन्यास पढ्दै गर्दा ‘रैया चाँदीको’ थेगो फुरेको गीतकार पन्तले सुनाए ।
‘उपन्यासकी पात्र ताराले मादी खोलो तरेको प्रसङ्ग आउँदा एक्कासि मलाई यो गीतको शब्द फुर्यो, भोलिपल्ट घरमा गुन्गुनाउँदै थेगो तयार पारें’, उनले भने, ‘आशिष दाइले भाखा तयार गरिसकेपछि गीत सार्वजनिक गर्ने हाम्रो योजना थियो तर काम अगाडि बढ्न सकेको थिएन, अहिले अचानक फिल्मका लागि गीत माग भएपछि गीतले पूर्णता पायो ।’
गीतकार पन्तले थेगो परिवर्तन नगर्ने सर्तमा मात्र आफूले उक्त गीत फिल्मका लागि उपलब्ध गराउन तयार भएको बताए । ‘फिल्म निर्माताले पनि सहजै रुपमा हाम्रो आग्रहलाई स्वीकार गरे, फिल्मको सार सुन्दै ३० को दशकको परिवेश झल्कने गरी रोधी बसेको शैलीमा शब्द लेखें, थेगो भने पुरानै कायम भयो’, पन्तले भने । ‘सुपरहिट’ फिल्ममा गीतकारका रुपमा प्रस्तुत हुँदा आफूलाई भाग्यशाली सम्झेको उनले बताए ।
हाल अमेरिकामा रहेका पन्त डेढ दशकदेखि गीत लेखनमा सक्रिय छन् । बागलुङका पन्तले लेखेका ‘सालको पातको टपरी’, ‘डाँडै फर्के सल्लो’, ‘मायालुको सहरमा’ लगायत गीत चर्चित छन् । लोकदोहोरीसँगै पञ्चेबाजा, सालैजो, यानीमाया, सुनिमाया लगायत मौलिक गीतमा समेत पन्तले शब्द लेखेका छन् ।
