१६ असोज, काठमाडौं । माओवादी केन्द्रको विद्यार्थी संगठन अखिल क्रान्तिकारीको २३ औं राष्ट्रिय सम्मेलन नयाँ नेतृत्व छान्दै नछानी स्थगित गरेको छ ।
निर्वाचन समितिले बुधबार एक सूचना जारी गरी बाढी पहिरोले धनजनको क्षति भएको, दशैं सुरु हुन लागेको र दशैं अघि निर्वाचन सक्न कठिन हुने कारण देखाएर सम्मेलन स्थगित गरेको उल्लेख गरेको छ ।
पञ्चा सिंह नेतृत्वमा रहेको कमिटी विघटन गरेपछि नयाँ कमिटी ल्याउनका लागि वीरबहादुर थापाको संयोजकत्वमा सात सदस्यीय अध्यक्ष मण्डल बनाइएको थियो । अध्यक्षमण्डललाई बुधबार साँझ निर्वाचन आयोगले राष्ट्रिय सम्मेलन स्थगित गर्न उपयुक्त हुने सुझाव सहितको प्रतिवेदन बुझाएको हो ।
उमेर हद लागु गर्ने/नगर्ने विवादमा सम्मेलन तीन दिनदेखि अड्किएको छ । स्थगित राष्ट्रिय सम्मेलन कहिले गर्ने बारे पार्टीसँग संवाद गरेर निर्णय गरिने अध्यक्षमण्डलका एक सदस्यले जानकारी गराए ।
तीन दिनसम्म सम्मेलन केन्द्र अशान्त
पार्टी अध्यक्ष पुष्पकमल दाहाल प्रचण्डलाई सोमबार विद्यार्थी नेताहरुले भेटेपछि उमेर हदबारे मतदानबाट निर्णय लिने गरी प्रक्रिया अघि बढाउने तयारी थियो । उमेर हदको पक्ष र विपक्षमा मतदान गर्ने र उमेरका लागि २८, ३० र ३२ मध्ये एक रोज्ने गरी मतदान गराउन लागिएको थियो ।
उमेर हदको विपक्षमा एक समूह मुद्दा प्रवेश हुनासाथ देखियो । विघटित कमिटीका उपाध्यक्ष एवं अध्यक्षका आकांक्षी तुकमान महराको समूह सोमबार तोडफोडमा उत्रियो । उमेर हद लगाउनुपर्ने पक्षधरले उनीहरुको काउन्टर गरे । पार्टीबाट खटिएका उपमहासचिव शक्ति बस्नेत र अखिल क्रान्तिकारीका पूर्व अध्यक्षहरुले दुई समूहको विवादलाई मत्थर पारे ।
मतदान प्रक्रियामा जानुअघि विवादित सात जिल्लाको प्रतिनिधि टुंग्याउन लागियो । अखिल क्रान्तिकारीका नेताहरुका अनुसार विवादित जिल्लाको प्रतिनिधि टुंगो लगाएर मंगलबार १२ बजे अघि निर्वाचन समितिलाई प्रतिनिधिहरुको नाम बुझाइएको थियो ।
निर्वाचन समितिले मतदान प्रक्रिया सुरु नगर्दै उमेरहदका विपक्षमा मंगलबार पुनः विरोध गरे । दोस्रो दिन पनि भनाभन, हात हालाहाल र कुर्ची तोडफोड भएपछि मतदान प्रक्रिया सुरु हुन सकेन ।
मंगलबार सहमति जुट्न नसकेपछि उमेर हदको मुद्दालाई टुंग्याउने गरी अध्यक्ष मण्डलले बुधबारका लागि मतदानको कार्यतालिका सार्वजनिक गरेको थियो । तर, बुधबार पनि निर्वाचन प्रक्रिया सुरु हुन सकेको छैन ।
बुधबार बिहान अध्यक्ष प्रचण्डले पदाधिकारी बैठक खुमलटार डाकेका थिए । विद्यार्थीको समस्या विद्यार्थीले नै समाधान निकाल्नुपर्ने भन्दै पदाधिकारीले संगठनलाई नै जिम्मेवारी दिएको थियो ।
बुधबार मतदान हुने आशामा रहेका प्रतिनिधिहरु बिहीबार विहान १० बजेबाट बन्द सत्र सुरु हुने निर्णय सार्वजनिक गरेपछि आक्रोशित बनेका थिए ।
बिहीबारका लागि बन्द सत्र सारिएपछि गण्डकीका प्रतिनिधिले सम्मेलन केन्द्रका कुर्ची तोडफोड गरे । सम्मेलन अनिश्चित बनेपछि प्रतिनिधिहरु निराश भई घर फर्किएको प्रतिनिधि मदन ढकालले जानकारी गराए । ‘काठमाडौंमा घर र आफन्त हुने केही प्रतिनिधि रहन्छन् । धेरै घरतिर लागे,’ ढकालले भने ।
उमेर हदको विपक्षमा मुख्य गरी उपाध्यक्ष तुकमान महरा, केशव रावल लगायतका विद्यार्थी नेता देखिएका छन् । उमेर हद लागु हुँदा अध्यक्षमा दाबी गरेका सबै जना उम्मेदवार हुन नपाउने अवस्था बन्ने छ ।
दुबै पक्षका आ–आफ्ना अडान
उमेर हद लागु हुनुपर्छ र हुनुहुँदैन भन्ने दुबै थरीले आ–आफ्नो तर्क पेश गरेका छन् । संघर्षबाट आएकालाई उनीहरुको योगदानको अवमूल्यन हुने गरी संगठनबाट बाहिर पठाउन नहुने उमेर हद लागु गर्न हुँदैन भन्ने पक्षधरको भनाइ छ ।
उनीहरुले अर्को तर्कमा आन्दोलनबाट आएकाले सडकको मोर्चा सम्हाल्नसक्ने र परिपक्वता हुने दाबी गरेका छन् । ‘अहिले पार्टी प्रतिपक्षमा छ । कुनै बेला सडक संघर्षमा जानुपर्ने हुनसक्छ । यसरी संगठनमा विवाद ल्याएर बनेको सभापतिले भोलि सडकको मोर्चामा कमिटीलाई कसरी परिचालन गर्न सक्छ ?’ एक पूर्व पदाधिकारी भन्छन् ।
एउटा पक्ष परिपक्व व्यक्तिले नेतृत्व लिनुपर्ने तर्क देखाउँदै उमेर हद राख्न नहुनेमा अडान राखिरहेको छ ।
माओवादी केन्द्रको नेतृ धर्मशीला चापागाईं उमेर हद लगाउँदा परिपक्वता नहुने तर्कमा विमति राख्छिन् । विद्यार्थी संगठनको मुख्य दायित्व विद्यार्थीको हक हितका लागि हुनुपर्ने तर्क राख्दै उनले भनिन्,‘विद्यार्थीका हक अधिकारका लागि लड्न पहिले आफू विद्यार्थी हुनुपर्यो नि । परिपक्वताका नाममा सधैंभरि विद्यार्थी संगठनमा रहने र धेरै उमेर भएकाले मात्रै आन्दोलनको नेतृत्व गर्छ भन्ने छैन नि ।’
उमेर हद लागु गर्नुपर्ने पक्षधरले विगतमा आन्दोलन सहभागी भएको आधारमा त्यसको व्याज खान अघिल्लो पुस्ता लागेको आरोप लगाएको छ । नयाँलाई हस्तान्तरण र पुस्तान्तरणका लागि उमेर हद लागु अनिवार्य रहेको उनीहरुको तर्क छ ।
अघिल्लो पुस्ता विद्यार्थी संगठनमा टिकिराख्न बल गर्दा नेतृत्व विकासमा जाम लाग्ने उनीहरुको भनाई छ । नेतृ चापागाईं उमेर हद लगाउनै पर्ने विचार राख्छिन् । ‘कति वर्षको उमेर हद लगाउने एउटा पाटो हो । तर, उमेर हद त तोक्नुपर्छ’, उनले भनिन्, ‘विद्यार्थीका मुद्दा उठाउन सक्ने निश्चित उमेर समूहमा हुन्छ नकि ५० औं वर्ष हुँदा पनि त्यसको संगठनमा देखिनु गलत हुन्छ ।’
