काठमाडौँ । पाठ्यक्रम विकास केन्द्रले विद्यालय तहको पाठ्यक्रममा अनलाइनमा बाल संरक्षणसम्बन्धी विषयवस्तु पनि समावेश गर्ने तयारी गरेको छ ।
अनलाइनका माध्यमबाट बालबालिकामाथि हिंसा तथा दुर्व्यवहार बढेको भन्दै त्यसको न्यूनीकरणका लागि विद्यार्थीहरूलाई जागरूक तथा सचेत बनाउन पाठ्यक्रममै यो विषय समावेश गर्न लागिएको हो ।
केन्द्रका महानिर्देशक इमनारायण श्रेष्ठले ६ देखि १२ कक्षासम्मको पाठ्यक्रममा अनलाइनमा बाल संरक्षणसम्बन्धी विषय समावेश गर्ने तयारी भइरहेको जानकारी दिनुभयो ।
मस्यौदा हस्तान्तरण
विद्यालय तहको पाठ्यक्रम तथा शिक्षक निर्देशिकामा कस्ता विषय समावेश गर्ने भनेर तयार पारिएको ‘अनलाइनमा बाल संरक्षणसम्बन्धी मस्यौदा’ केन्द्रका अध्यक्ष श्रेष्ठलाई हस्तान्तरण गरिएको छ ।
बाल अधिकारका क्षेत्रमा क्रियाशील सिविन नेपालको समन्वयमा तयार पारिएको मस्यौदा राजधानीमा आयोजित एक समारोहबीच सिविनका अध्यक्ष माधव प्रधानले पाठ्यक्रम विकास केन्द्रका अध्यक्ष श्रेष्ठलाई हस्तान्तरण गर्नुभएको हो ।
मस्यौदामा अनलाइनबाट बालबालिकामाथि हुने हिंसा न्यूनीकरणका लागि मुख्यगरी १० वटा विषयलाई प्राथमिकता दिइएको छ । केन्द्रका अध्यक्ष श्रेष्ठले सरोकारवाला निकाससँग थप छलफल गरी मस्यौदालाई अन्तिम रूप दिइने बताउनुभयो ।
पाठ्यक्रममै अनलाइन बाल संरक्षणको विषय समावेश हुन सके बालबालिकामाथि अनलाइनबाट हुने हिंसा न्यूनीकरणमा महत्वपूर्ण योगदान पुग्ने सिविनका कार्यक्रम निर्देशक माधव लोहनीले बताउनुभयो । उहाँले यसका लागि शिक्षकसँगै अभिभावक पनि सचेत रहनुपर्ने बताउनुभयो ।
