क्राइमचेक प्रतिनिधि/
वीरगंज/यस वर्षको तिहारको यमपंचक बिहिबारदेखि शुरु भएको छ । यमपंचक अन्तर्गत पर्ने भाइटीकाकोलागि मंसिर १ गते बिहान ११:३७ बजेको साइत उत्तम हुने ज्योतिष सम्राट पंडित पुरुषोत्तम दुबेले बताएका छन् ।
भाइटिकाका दिन मंसिर १ गते मध्याह्नकालमा टीका लगाउन बाधा नपरे पनि साइत खोज्नेका लागि मकर लग्न, वृष नवमांश, अभिजित् मुहूर्तको शुभसाइत दिइएको पंडित दुबेले बताए ।
यस वर्ष यमपञ्चक कात्तिक २७ गतेदेखि शुरु हुन्छ । त्यस दिनदेखि यमदीप दान शुरु गरिन्छ । कात्तिक २८ गते काग तिहार परेको छ । त्यस्तै कार्तिक २९ गते शनिवारका दिन कुकुर तिहार र लक्ष्मी पूजा परेको छ । त्यस्तै कार्तिक ३० गतेका दिन गाई/गोरु तिहार र म्ह पूजा परेको पंडित दुबेले बताए ।
पंडित दुबेले दिनु भएको जानकारी अनुसार कात्तिक २९ गते बिहान नरक स्नानसहित कुकुर तिहार र बेलुकी लक्ष्मीपूजा परेको छ । अपराह्न १:४९ बजेसम्म कार्तिक कृष्ण चतुर्दशी र त्यसपछि औंशी तिथि लागेको छ । सायंकालमा औँशी तिथि परेका दिन लक्ष्मीपूजा गर्नुपर्ने शास्त्रीय वचन छ । औंसी तिथिमा गरिने स्नान, दान भने कात्तिक ३० गते बिहान गर्नुपर्नेछ ।
गाई, गोरु र आत्म (म्ह) पूजा भने कात्तिक ३० गते गर्नुपर्ने उनले बताए । कार्तिक शुक्ल प्रतिपदाको संध्याकालमा आत्मपूजा गर्नुपर्ने “कृत्यवाटिका” नामक ग्रन्थमा उल्लेख गरिएको छ । आइतबार बिहान ११:२७ बजेसम्म औँसी तिथि परेको छ । गोवद्र्धन पूजा र भाइटिका भने मंसिर १ गते परेकोले सो दिन दिनभरी पनि दिदी बहिनीले आफ्ना दाजुभाइलाई टिका लगाइ आशीर्वाद दिन सकिने पंडित दुबेले बताएका छन् ।
